Pa medio di drama i teater, Kas di Teater di Teatro Bulabanda, ta traha na kontribuí na un mihó Kòrsou i pa yuda forma e Yu di Kòrsou, ku ta siña wak su mes i su komunidat ku un bista krítiko. Nos ta buska hóben ku ta krea opinion i ku no ta simplemente aseptá lo ku ta pasa, sino ku ta analisá i vosiferá su punto di bista.
Kas di Teater ta un sentro pa formashon pa hóbennan te ku 24 aña ku un enfoke riba arte komo instrumento pa progreso di Kòrsou. Nos ta krea oportunidat pa hóbennan desaroyá nan talento, no solamente pa haña un karera den teatro, sino tambe pa forma un Yu di Kòrsou ku por enfrenta su futuro ku kreatividat, balentía, i kompromiso.
Nos mishon
Nos mishon ta pa forma i eduká talento hóben pa desaroyá su abilidat den teater, arte, skirbimentu i pensamentu krítiko. Atraves di drama i teater, nos stimulá e kuriosidat, imaginashon i reforsá e kapasidat di pensa profundamente i ekspresá emoshon di akshon visual pa tarima. Kas di Teater ta un lugá sèif kaminda hóbennan por eksplorá, eksperimentá, faya dal abou, lanta bèk i bolbe purba atrobe. Esaki ta enserá tuma riesgo.
Nos vishon: teater pa un mihó Kòrsou
Nos ta kere den teater komo hèrmènt pa kambia i mehorá Kòrsou. Nos ta usa teater pa enfrentá e preguntanan difísil, pa krea un espasio pa diálogo ku bista krítiko i pa stimulá buska solushon huntu.
